Bisedimet e planifikuara mes Shteteve të Bashkuara dhe Iranit, të cilat pritej të zhvilloheshin në resortin malor Burgenstock në Zvicër, janë shtyrë për një datë të pacaktuar. Lajmi është konfirmuar nga Ministria e Jashtme e Zvicrës, e cila theksoi se mbetet e gatshme të lehtësojë procesin e dialogut mes palëve.
Autoritetet zvicerane nuk dhanë detaje mbi arsyet e plota të shtyrjes apo mbi kohën kur mund të zhvillohen takimet e ardhshme, por bënë të ditur se përgatitjet teknike dhe organizative në Burgenstock do të vazhdojnë.
Në zhvillimet e fundit, është raportuar se edhe zëvendëspresidenti amerikan JD Vance ka anuluar udhëtimin e planifikuar drejt Zvicrës. Sipas një zëdhënësi të Shtëpisë së Bardhë, vizita e tij është shtyrë për shkak të vështirësive logjistike.
Takimi pritej të mblidhte zyrtarë amerikanë dhe iranianë, së bashku me ndërmjetësues nga Pakistani dhe Katari, me synimin për të nisur negociatat mbi zbatimin e marrëveshjes së arritur së fundmi mes dy vendeve.
Vetëm një ditë më parë, presidenti amerikan Donald Trump dhe presidenti iranian Masoud Pezeshkian nënshkruan një marrëveshje paraprake që synon t’i japë fund konfliktit në Iran. Dokumenti i përkohshëm parashikon një periudhë 60-ditore negociatash, gjatë së cilës palët duhet të arrijnë një marrëveshje përfundimtare.
Megjithëse shtyrja e bisedimeve ka krijuar pasiguri për afatet e procesit diplomatik, autoritetet zvicerane kanë bërë të ditur se mbështetja për dialogun mbetet e pandryshuar dhe se puna për organizimin e takimit do të vijojë.
