Kreu i Partisë Demokratike, Sali Berisha, ka rikthyer sot në qendër të deklaratave të tij çështjen e njohur si dosja “Aruba”, duke vënë në shënjestër kreun e Struktura e Posaçme Kundër Korrupsionit dhe Krimit të Organizuar, Altin Dumani.
Në qëndrimin e tij publik, Berisha akuzoi prokurorinë e posaçme se po mban të fshehtë identitetin e një zyrtari të lartë qeveritar, i cili sipas tij dyshohet të ketë marrë pjesë në takime të zhvilluara në Aruba. Ai kërkoi që Komisioni i Ligjeve të Kuvendit të thërrasë prokurorët për të dhënë shpjegime mbi mënyrën e trajtimit të çështjes.
Sipas Berishës, mungesa e transparencës në këtë dosje përbën, siç u shpreh ai, një tregues të ekzistencës së një “narkoshteti”, duke theksuar se interesi publik duhet të përqendrohet tek zyrtarët e dyshuar për lidhje me grupe kriminale.
Megjithatë, në deklaratën e tij publike, kreu i opozitës nuk përmendi asnjë nga emrat e personave që janë përfolur në kuadër të hetimeve të SPAK-ut për këtë çështje, përfshirë figura të lidhura me rrjetin e dyshuar financiar dhe biznesmenë të përmendur më herët në raportimet mediatike.
Në vend të tyre, Berisha e fokusoi kritikën te drejtuesi i SPAK-ut, duke e akuzuar institucionin për mungesë hetimi të plotë dhe për, sipas tij, mbrojtje të aktorëve politikë të përfshirë në çështje.
Deklaratat e tij u shoqëruan edhe me akuza të përgjithshme ndaj qeverisë aktuale dhe kryeministrit Edi Rama, duke e lidhur dosjen “Aruba” me një klimë më të gjerë politike përplasjesh mes mazhorancës dhe opozitës.
Çështja mbetet ende në qendër të debatit publik, ndërsa hetimet e SPAK-ut për dosjen “Aruba” vijojnë të jenë objekt interesimi dhe interpretimesh të ndryshme politike.
