Presidenti amerikan Donald Trump ka deklaruar se Kina ka rënë dakord të porosisë 200 avionë nga kompania amerikane Boeing, në atë që konsiderohet marrëveshja më e madhe mes palëve në sektorin e aviacionit pas shumë vitesh tensione tregtare.
Duke folur për Fox News pas takimit me presidentin kinez Xi Jinping në Pekin, Trump tha se marrëveshja tejkaloi pritshmëritë fillestare të kompanisë amerikane.
“Një gjë për të cilën ai ra dakord sot është se do të porosisë 200 avionë. Boeing kërkonte 150 dhe mori 200”, deklaroi Trump, duke iu referuar Xi Jinping.
Megjithatë, deri tani nuk janë bërë publike detaje të plota mbi marrëveshjen, ndërsa mbetet e paqartë se për cilat modele avionësh bëhet fjalë dhe kur do të realizohen dorëzimet.
Pavarësisht njoftimit, aksionet e Boeing ranë me më shumë se 4% pas transmetimit të deklaratës së Trump, pasi tregjet kishin pritur një marrëveshje edhe më të madhe. Mediat amerikane kishin raportuar më herët se kompania po negocionte shitjen e 500 ose më shumë avionëve drejt Kinës.
Edhe Sekretari amerikan i Thesarit, Scott Bessent, kishte paralajmëruar më parë se gjatë vizitës së Trump në Pekin pritej një njoftim i rëndësishëm lidhur me një porosi të madhe për Boeing.
Nëse konfirmohet plotësisht, kjo do të ishte blerja e parë e madhe e avionëve komercialë amerikanë nga Kina në afro një dekadë, duke sinjalizuar një afrim ekonomik mes dy fuqive më të mëdha botërore.
