Një nga barnat më të vjetra dhe më të përdorura në botë, Aspirin, po shihet gjithnjë e më shumë nga shkenca si një mundësi potenciale edhe në luftën kundër kancerit.
Studime të fundit sugjerojnë se ky medikament, i njohur kryesisht për uljen e dhimbjes dhe temperaturës, mund të ndihmojë në uljen e rrezikut të zhvillimit dhe përhapjes së disa llojeve të tumoreve.
Një rast i ndjekur në Britani i një pacienti me rrezik të lartë gjenetik për kancer të zorrës së trashë ka tërhequr vëmendje të veçantë. Ai ka marrë aspirinë çdo ditë për më shumë se dhjetë vjet dhe deri tani nuk ka zhvilluar sëmundjen. Studiuesit theksojnë se te personat me sindromën Lynch, një çrregullim gjenetik që rrit ndjeshëm rrezikun për kancer, përdorimi i rregullt i aspirinës për të paktën dy vite mund të ulë deri në 50% mundësinë e shfaqjes së kancerit të zorrës së trashë.
Gjetjet po ndikojnë edhe në udhëzimet mjekësore në disa vende, përfshirë Britaninë e Madhe dhe Suedinë, ku për pacientët me rrezik të lartë po rekomandohen doza të ulëta të aspirinës nën mbikëqyrje mjekësore.
Përveç parandalimit, disa studime sugjerojnë se aspirina mund të ndihmojë edhe në uljen e rrezikut të rikthimit të kancerit pas trajtimit, duke penguar përhapjen e qelizave kancerogjene në trup.
Shkencëtarët mendojnë se efektet lidhen me ndikimin e aspirinës në proceset inflamatore dhe në mënyrën si sistemi imunitar identifikon qelizat e dëmtuara apo tumorale.
Megjithatë, ekspertët paralajmërojnë se përdorimi i saj nuk është pa rreziqe, pasi mund të shkaktojë gjakderdhje të brendshme dhe probleme gastrointestinale. Për këtë arsye, mjekët theksojnë se nuk duhet përdorur pa këshillë specialisti, veçanërisht nga persona pa indikacion mjekësor.
