Ish-drejtoresha e Agjencisë Kombëtare të Shoqërisë së Informacionit (AKSHI), Mirlinda Karçanaj, ka ndërmarrë një hap të ri ligjor duke depozituar rekurs në Gjykatën e Lartë, ku kundërshton masën e sigurisë “arrest në shtëpi” dhe kërkon heqjen e saj.
Sipas burimeve mediatike, kërkesa është regjistruar zyrtarisht dhe për shqyrtimin e çështjes është hedhur shorti, i cili ka caktuar si gjyqtar relator anëtarin e Gjykatës së Lartë, Genti Shala.
Karçanaj, e cila për vite me radhë ka drejtuar një nga institucionet kyçe të teknologjisë dhe digjitalizimit në vend, ndodhet nën hetim nga Prokuroria e Posaçme Kundër Korrupsionit dhe Krimit të Organizuar (SPAK), nën akuza të rënda që lidhen me procedurat e prokurimeve publike.
Ajo akuzohet për “shkelje të barazisë në tendera” në bashkëpunim dhe në kuadër të një grupi të strukturuar kriminal, si dhe për pjesëmarrje në organizatë kriminale. Sipas hetimeve, në këtë çështje janë përfshirë edhe emra të tjerë si Ergys Agasi dhe biznesmeni Ermal Beqiri, i lidhur me kompani që kanë përfituar kontrata të konsiderueshme publike.
Në të njëjtën dosje përfshihet edhe ish-zëvendësdrejtoresha Hava Delibashi, ndaj së cilës masa e sigurisë është zbutur në “detyrim për paraqitje” dhe “ndalim për të dalë jashtë vendit”.
Ndërkohë, tre biznesmenë – Andis Papa, Gëzim Hoxha dhe Rogers Rryta – janë vendosur nën masën “ndalim i largimit nga vendi”, ndërsa zv.drejtori i Policisë së Tiranës, Erjon Ismaili, është pezulluar nga detyra dhe përballet me akuza të lidhura me veprimtari kriminale.
SPAK ka bërë me dije se hetimet lidhen me një skemë të dyshuar të manipulimit të tenderëve publikë dhe favorizimit të subjekteve të caktuara, duke ngritur dyshime për një rrjet të organizuar që ka operuar në dëm të konkurrencës dhe fondeve publike.
Çështja tashmë pritet të shqyrtohet nga Gjykata e Lartë, e cila do të vendosë nëse masa e sigurisë ndaj Karçanajt do të mbetet në fuqi apo do të ndryshojë, në një proces që pritet të tërheqë vëmendje të madhe publike dhe politike.
