Aktori i njohur amerikan Sean Penn, 65 vjeç, është rikthyer në qendër të vëmendjes mediatike pas publikimit të disa pamjeve ku shfaqet krah partneres së tij, Valeria Nicov, e cila është 34 vite më e re se ai.
Çifti u fotografua gjatë një daljeje të zakonshme për pazar në Santa Monica, por ajo që ndezi menjëherë rrjetet sociale nuk ishte vetëm diferenca e madhe e moshës. Përdoruesit vunë re edhe kontrastin e dukshëm në gjatësi mes tyre, duke e kthyer pamjen në objekt debatesh, ironish dhe komentesh të shumta.
“Duket sikur është vajza e tij”, “Çifti më i çuditshëm që kam parë”, “Më pëlqen fakti që nuk kompleksohet”, “Duhet të jetë shumë i shkurtër”, janë vetëm disa nga reagimet që qarkulluan me shpejtësi në platformat sociale.
I njohur për ruajtjen e privatësisë, Sean Penn nuk ka komentuar publikisht lidhjen me Nicov dhe nuk e ka përmendur atë në intervistat e tij. Megjithatë, thashethemet për romancën nisën në shtator 2024, kur të dy u panë së bashku në Madrid.
Konfirmimi i parë publik i lidhjes erdhi në nëntor, kur Penn dhe Nicov u shfaqën në tapetin e kuq të edicionit të 21-të të Festivalit Ndërkombëtar të Filmit në Marrakesh, ku aktori u nderua për kontributin e tij të jashtëzakonshëm në kinematografi.
Sean Penn ka një jetë sentimentale të pasur dhe shpesh të komentuar. Ai ka qenë i martuar tri herë: me Madonnën (1985–1988), Robin Wright (1996–2010) dhe Leila George (2020–2022). Gjatë viteve, ai është përfolur edhe për lidhje me emra të njohur të Hollivudit si Charlize Theron, Scarlett Johansson dhe Olga Korotyaeva.
Pamjet e fundit tregojnë se, pavarësisht kritikave dhe zhurmës në rrjet, Sean Penn vazhdon të jetojë sipas zgjedhjeve të tij, edhe kur ato bëhen objekt debatesh të forta publike.
