Administrata amerikane, e udhëhequr nga presidenti Donald Trump, planifikon të zhvendosë fondet për parandalimin e terrorizmit nga shtetet e udhëhequra nga Demokratët, në ato të udhëhequra nga Republikanët, ndërsa rishikon një program prej 1 miliardë dollarësh të krijuar pas sulmeve të 11 shtatorit.
Dymbëdhjetë shtete të udhëhequra nga Demokratët po padisin për të bllokuar shkurtimet, duke pretenduar se administrata Trump po përpiqet t’i ndëshkojë ata për mosbashkëpunimin me agjentët federalë të imigracionit.
Administrata Trump publikoi vlerësime në fund të verës se sa para duhet të presë secili shtet të marrë nga programi. Më vonë, në fund të shtatorit, njoftimet e dërguara shteteve nga Agjencia Federale e Menaxhimit të Emergjencave ndryshuan shumat. Wisconsin, Karolina e Veriut dhe Ohio, shtete që Trump fitoi në vitin 2024, panë rritjet më të mëdha në përqindje, sipas dokumenteve të para nga Reuters.
Washington, Illinois dhe New Jersey, të cilat anojnë nga Partia Demokratike, panë uljet më të mëdha. Në përgjithësi, uljet për Washingtonin ishin 70%, Illinois 69% dhe New Jersey 49% e asaj që administrata kishte thënë fillimisht se shtetet do të merrnin. Kalifornia gjithashtu humbi 31% të asaj që duhej të merrte.
Një zëdhënës i Departamentit të Sigurisë Kombëtare të SHBA-së tha në një deklaratë se shpërndarjes së fondeve iu dha peshë më e madhe kërcënimeve nga krimi i organizuar ndërkombëtar dhe organizatat kriminale që veprojnë përtej kufijve ndërkombëtarë. Ai tha se u morën në konsideratë edhe kalimet e paligjshme të kufirit.
Kongresi i SHBA-së krijoi programin e Granteve të Sigurisë Kombëtare pas sulmeve të 11 shtatorit 2001 për të ndihmuar shtetet dhe qytetet të parandalojnë terrorizmin dhe kërcënimet e tjera të dhunshme
