Presidenti i Shteteve të Bashkuara, Donald Trump, ka paralajmëruar një përshkallëzim të ri të operacioneve ushtarake kundër Iranit, duke deklaruar se objektivat e ardhshëm të sulmeve amerikane do të jenë infrastruktura energjetike dhe urat, nëse Teherani nuk rikthehet në tryezën e negociatave.
Në një intervistë për televizionin amerikan Fox News, Trump u shpreh se administrata e tij është e gatshme të intensifikojë presionin ushtarak ndaj Iranit, duke paralajmëruar se situata për autoritetet iraniane do të përkeqësohet nëse nuk pranojnë të negociojnë.
“Gjërat do të bëhen shumë më të këqija për ta. Javën e ardhshme do të jenë termocentralet dhe javën pas saj do të jenë urat, nëse iranianët nuk ulen në tryezë dhe nuk negociojnë”, deklaroi presidenti amerikan.
I pyetur se për sa kohë do të vazhdojnë sulmet ajrore amerikane, Trump u përgjigj se operacionet nuk do të ndalen derisa administrata e tij ta konsiderojë të përmbushur objektivin.
“Ato do të vazhdojnë derisa të them se mjaft është mjaft”, u shpreh ai.
Deklaratat e presidentit amerikan vijnë pasi ushtria e Shteteve të Bashkuara njoftoi se ka ndërmarrë një valë të re sulmesh ndaj objektivave në Iran dhe ka rivendosur bllokadën ndaj porteve jugore të vendit.
Nga ana tjetër, Trump duket se ka zbutur qëndrimin lidhur me planin e shpallur më herët për vendosjen e një tarife ndaj anijeve tregtare që kalojnë nëpër Ngushticën e Hormuzit. Ky propozim ishte paraqitur si pjesë e strategjisë amerikane për kontrollin e sigurisë në një nga korridoret detare më të rëndësishme për tregtinë botërore.
Tensionet mes Uashingtonit dhe Teheranit vijojnë të mbeten të larta, ndërsa administrata amerikane këmbëngul se presioni ushtarak dhe ekonomik do të vazhdojë derisa Irani të pranojë rikthimin në negociata.
