Modelja dhe prezantuesja e njohur Tyra Banks ka ngritur një padi kundër Netflix, duke e akuzuar platformën për shpifje dhe paraqitje të rreme në dokumentarin Reality Check: Inside America’s Next Top Model.
Padia u dorëzua më 13 qershor dhe lidhet me mënyrën se si Banks është portretizuar në dokumentarin që trajton prapaskenat dhe polemikat e spektaklit të famshëm America’s Next Top Model. Sipas saj, përmes montazhit selektiv dhe lënies jashtë të pjesëve të rëndësishme të intervistës, është krijuar një imazh mashtrues për rolin e saj si prezantuese, anëtare jurie dhe producente ekzekutive.
Në dokumentet gjyqësore, Banks pretendon se dokumentari ndërton një “rrëfim të rremë”, duke sugjeruar se ajo kishte dijeni për një rast të pretenduar sulmi seksual ndaj një konkurrenteje, se e kishte shfrytëzuar traumën e saj për të rritur audiencën dhe se më pas nuk e mbante mend ngjarjen kur u pyet për të.
Prezantuesja i ka mohuar kategorikisht këto pretendime, duke i cilësuar si të pavërteta dhe dëmtuese për reputacionin e saj. Ajo argumenton se dokumentari ka krijuar një perceptim të gabuar që është shpërndarë në mbarë botën përmes platformës së transmetimit.
Dokumentari në fjalë shqyrton debatet dhe kritikat që kanë shoqëruar 24 sezonet e “America’s Next Top Model”, përfshirë akuzat e ngritura nga ish-konkurrentë lidhur me mënyrën e trajtimit të tyre gjatë produksionit.
Banks ka deklaruar se pranoi të merrte pjesë në projekt me qëllim që të kontribuonte në një diskutim të hapur dhe të ndershëm mbi kritikat ndaj emisionit. Megjithatë, sipas padisë, nga një intervistë prej rreth tre orë e gjysmë janë përdorur vetëm 16 minuta material, duke nxjerrë deklaratat e saj jashtë kontekstit.
