Anglia pritet të paraqitet me disa ndryshime të rëndësishme në ndeshjen e saj të parë në Kupën e Botës 2026 ndaj Kroacisë, ndërsa trajneri Thomas Tuchel duket se ka marrë vendimet kryesore për formacionin titullar.
Sipas raportimeve të mediave britanike, Anthony Gordon është favorit për të nisur sfidën nga minuta e parë në krahun e majtë të sulmit, duke lënë në stol Marcus Rashfordin. Tekniku gjerman vlerëson lart disiplinën taktike, energjinë dhe angazhimin e Gordonit edhe në fazën mbrojtëse, elementë që i konsideron vendimtarë për të kontrolluar ritmin e ndeshjes ndaj kroatëve.
Ndërkohë, Rashford pritet të jetë një nga armët kryesore që Tuchel mund të aktivizojë gjatë pjesës së dytë. Shpejtësia dhe aftësia e tij për të krijuar rrezik në hapësira konsiderohen si faktorë që mund të bëjnë diferencën në momentet vendimtare të takimit.
Në repartin defensiv, John Stones pritet të formojë çiftin e qendrës së mbrojtjes me Ezri Konsa. Edhe pse Marc Guehi shihej si kandidati kryesor para nisjes së turneut, Tuchel duket se preferon forcën fizike dhe dominimin në lojën ajrore që ofron Konsa, në kombinim me cilësitë teknike të Stones.
Një tjetër çështje që vijon të shqetësojë kampin anglez është gjendja fizike e Bukayo Sakas. Ylli i Arsenalit ende nuk ka rikuperuar plotësisht formën e tij pas problemeve të vazhdueshme me tendinin e Akilit dhe nuk pritet të jetë titullar në sfidën e parë.
Për pasojë, Noni Madueke shihet si zgjedhja më e mundshme për krahun e djathtë të sulmit. Në miqësoren e fundit me dyer të mbyllura ndaj Miamit, të fituar nga Anglia me rezultatin 6-0, Saka luajti vetëm një pjesë, duke konfirmuar se ende nuk është në kushtet optimale.
Në prag të përballjes me Kroacinë dhe Luka Modriçin, Tuchel duket se ka zgjedhur një strategji të ekuilibruar, duke kombinuar sigurinë në formacionin titullar me mundësinë për të hedhur në fushë lojtarë vendimtarë nga stoli gjatë rrjedhës së ndeshjes.
