Një situatë e pazakontë dhe krejtësisht e re në futbollin ndërkombëtar ka tërhequr vëmendjen e tifozëve gjatë ndeshjes mes Kombëtares së Shteteve të Bashkuara dhe Paraguait. Për herë të parë u vu në zbatim një nga ndryshimet më të fundit në përdorimin e sistemit VAR, duke shkaktuar konfuzion mes lojtarëve, tifozëve dhe komentatorëve.
Episodi ndodhi kur gjyqtari holandez Danny Makkelie ndëshkoi me karton të verdhë mbrojtësin amerikan Tim Ream për një ndërhyrje të dyshuar ndaj sulmuesit paraguajan Miguel Almiron. Fillimisht gjithçka dukej një vendim rutinë, por pak sekonda më vonë ndërhyri dhoma e VAR-it, e cila kërkoi rishikimin e pamjeve filmike.
Pas analizimit të aksionit, arbitrat e VAR-it konstatuan se situata ishte interpretuar gabim. Pamjet treguan se nuk kishte pasur asnjë kontakt mes Tim Ream dhe Miguel Almiron. Përkundrazi, sipas vlerësimit të arbitrave, futbollisti paraguajan kishte simuluar faullin për të përfituar një vendim në favor të skuadrës së tij.
Në bazë të rregullores së re të FIFA-s për përdorimin e VAR-it, gjyqtari u rikthye te monitori anës fushës dhe vendosi të anulonte kartonin e verdhë të dhënë ndaj Ream. Më pas, ai ndëshkoi me karton të verdhë vetë Almironin për simulim.
Situata krijoi hutim të madh në stadium dhe në rrjetet sociale, pasi shumë tifozë nuk e kuptuan menjëherë se çfarë kishte ndodhur. Qindra komente u publikuan në internet nga ndjekës të futbollit që kërkonin shpjegime për vendimin e pazakontë.
Arsyeja e konfuzionit lidhet me ndryshimin e fundit të rregullave të VAR-it. Deri më tani, koncepti i “identitetit të gabuar” zbatohej vetëm në rastet kur arbitri ndëshkonte gabimisht një lojtar të së njëjtës skuadër në vend të autorit të shkeljes.
Megjithatë, në këtë Botëror rregulli është zgjeruar. Tashmë VAR-i mund të ndërhyjë edhe kur konstatohet se shkelja nuk është kryer fare nga lojtari i ndëshkuar, ose kur futbollisti i ekipit kundërshtar ka simuluar një faull për të mashtruar arbitrin.
Ky ishte pikërisht rasti në sfidën SHBA–Paraguai, ku kartoni i verdhë kaloi nga lojtari që u akuzua për faull te futbollisti që simuloi ndërhyrjen.
Madje edhe vetë Miguel Almiron u duk i habitur nga vendimi final, pasi fillimisht kishte fituar një faull në favor dhe pak çaste më vonë u ndëshkua me karton të verdhë.
Rasti po konsiderohet si një nga shembujt e parë praktikë të zbatimit të rregullit të ri të VAR-it dhe pritet të shërbejë si precedent për situata të ngjashme gjatë ndeshjeve të ardhshme të Botërorit. Ky ndryshim synon të luftojë simulimet dhe të rrisë saktësinë e vendimeve arbitrare, por episodi tregoi gjithashtu se tifozëve dhe futbollistëve do t’u duhet kohë për t’u përshtatur me mënyrën e re të funksionimit të teknologjisë në futboll.
