Procesi i numërimit të votave në Kosovë po shkon drejt përfundimit, ndërsa rezultatet paraprake tregojnë një avantazh të qartë të Lëvizjes Vetëvendosje në garën për përbërjen e Kuvendit të ri.
Sipas të dhënave të publikuara nga Komisioni Qendror i Zgjedhjeve, deri në orën 10:00 të së shtunës janë numëruar 2.497 nga gjithsej 2.691 vendvotime, që përbëjnë 92.79 për qind të totalit të votave.
Nga rezultatet e deritanishme, Lëvizja Vetëvendosje e kryeministrit në detyrë, Albin Kurti, renditet forca e parë politike me 310.591 vota, ose 44.09 për qind të votave të numëruara.
Në vendin e dytë pozicionohet Partia Demokratike e Kosovës me 146.670 vota, që përkthehen në 20.82 për qind të mbështetjes elektorale.
Ndërkohë, Lidhja Demokratike e Kosovës mban vendin e tretë me 120.257 vota ose 17.07 për qind, duke vijuar të mbetet një nga forcat kryesore politike në vend.
Pas saj renditet Aleanca për Ardhmërinë e Kosovës, e cila ka grumbulluar 49.939 vota, ose 7.09 për qind të totalit të votave të numëruara deri më tani.
Bazuar në këto rezultate paraprake, shpërndarja aktuale e mandateve në Kuvendin e Kosovës parashikohet të jetë si më poshtë:
- Lëvizja Vetëvendosje – 50 mandate
- Partia Demokratike e Kosovës – 23 mandate
- Lidhja Demokratike e Kosovës – 19 mandate
- Aleanca për Ardhmërinë e Kosovës – 8 mandate
Megjithëse numërimi nuk ka përfunduar ende plotësisht, trendi i deritanishëm tregon se nuk priten ndryshime të mëdha në renditjen e partive kryesore. Megjithatë, rezultati përfundimtar do të përcaktohet pas përmbylljes së numërimit të të gjitha votave dhe certifikimit zyrtar nga Komisioni Qendror i Zgjedhjeve.
Me procesin që po hyn në fazën e fundit, vëmendja tashmë po përqendrohet te negociatat e mundshme politike dhe krijimi i institucioneve të reja, ndërsa mbetet për t’u parë nëse forca fituese do të arrijë të sigurojë shumicën e nevojshme për formimin e qeverisë së ardhshme.
