Protesta qytetare kundër qeverisë dhe projektit të planifikuar në Zvërnec ka vijuar edhe këtë mbrëmje para Kryeministrisë, ku mijëra qytetarë u mblodhën për të shprehur pakënaqësitë e tyre ndaj politikave qeveritare dhe gjendjes sociale e ekonomike në vend.
Gjatë tubimit, gazetari Klevin Muka mori fjalën para protestuesve dhe mbajti një fjalim që tërhoqi vëmendjen e pjesëmarrësve, duke deklaruar se pas protestës nuk qëndrojnë parti politike apo grupe të organizuara, por problemet që, sipas tij, kanë prekur çdo familje shqiptare gjatë dekadave të fundit.
Ai tha se “organizatori” kryesor i protestës është shpopullimi i vendit, fenomen që sipas tij ka detyruar mijëra të rinj të largohen nga Shqipëria në kërkim të një jete më të mirë. Sipas Mukës, emigracioni masiv dhe boshatisja e vendit janë ndër arsyet kryesore që kanë nxjerrë qytetarët në shesh.
Si organizator të dytë ai përmendi çështjen e pronës private, duke e cilësuar atë një plagë të hapur prej më shumë se tre dekadash. Sipas tij, moszgjidhja e konflikteve pronësore dhe vonesat e gjata në drejtësi kanë krijuar pakënaqësi të thellë tek qytetarët.
Më pas, gazetari e cilësoi rininë shqiptare si “shpirtin e kësaj proteste”, duke theksuar se largimi i të rinjve nga vendi dhe mungesa e perspektivës janë ndër problemet më të mëdha me të cilat përballet Shqipëria sot.
Në vijim të fjalës së tij, Muka renditi edhe një sërë çështjesh të tjera që, sipas tij, janë bërë arsye për revoltën qytetare. Ai përmendi fëmijët dhe mungesën e hapësirave publike, drejtësinë dhe vonesat shumëvjeçare në gjykata, sistemin shëndetësor, arsimin, bujqësinë, pensionistët, si dhe minatorët e naftëtarët, të cilët i konsideroi kategori të lëna pas dore nga politika.
“Shpopullimi, prona private, rinia shqiptare, fëmijët tanë, drejtësia, shëndetësia, arsimi, bujqësia, pensionistët dhe minatorët janë vetëm disa nga organizatorët e kësaj proteste. Janë problemet reale që kanë sjellë njerëzit në këtë shesh”, u shpreh ai para turmës.
Në fund të fjalimit, gazetari theksoi se protesta ka një kërkesë kryesore dhe të panegociueshme.
“Grupi organizator ka katër pika. E para është dorëheqja. E dyta është dorëheqja. E treta është po ashtu dorëheqja. Ndërsa të katërtën besoj se e dini të gjithë: dorëheqja e qeverisë”, deklaroi ai, mes duartrokitjeve dhe thirrjeve të protestuesve.
Tubimi para Kryeministrisë u zhvillua në kuadër të protestave që nisën fillimisht kundër projektit turistik në Zvërnec, por që me kalimin e ditëve janë shndërruar në një lëvizje më të gjerë qytetare, ku po artikulohen kërkesa që lidhen me qeverisjen, mbrojtjen e pasurive publike, drejtësinë, ekonominë dhe të ardhmen e të rinjve në vend.
