Kalifornia Jugore në SHBA është përfshirë nga alarmi dhe evakuimet masive, pasi një rezervuar industrial me substanca kimike ndodhet në rrezik të lartë për rrjedhje apo shpërthim.
Autoritetet amerikane kanë urdhëruar largimin e rreth 40 mijë banorëve nga zona përreth impiantit, si masë parandaluese për shkak të rrezikut të madh që paraqet situata.
Sipas zyrtarëve, në rezervuar ndodhet metakrilat metil, një kimikat shumë i ndezshëm që përdoret gjerësisht në industrinë e plastikës dhe prodhimeve industriale. Në rast rrjedhjeje ose shpërthimi, substanca mund të çlirojë sasi të mëdha materiali toksik dhe të shkaktojë pasoja serioze për mjedisin dhe shëndetin publik.
Raportohet se ekziston rreziku që deri në rreth 26,500 litra kimikate të dalin jashtë kontrollit, duke krijuar një situatë potencialisht të rrezikshme edhe për objektet e tjera industriale pranë.
Ekipet e emergjencës dhe zjarrfikësit janë në terren dhe po punojnë për të stabilizuar temperaturën brenda rezervuarit, në përpjekje për të parandaluar rritjen e presionit të brendshëm. Autoritetet shpjegojnë se substanca e depozituar mund të kalojë nga gjendje e lëngshme në gaz, duke rritur ndjeshëm rrezikun e shpërthimit.
Situata përkeqësohet nga fakti se sistemet e lehtësimit të presionit në rezervuar dyshohet se nuk po funksionojnë siç duhet, duke e bërë ndërhyrjen edhe më urgjente.
Autoritetet kanë bërë thirrje për qetësi, ndërsa operacionet e emergjencës vijojnë në mënyrë intensive për të shmangur një katastrofë të mundshme industriale.
