Tensionet në Ngushticën e Hormuzit janë përshkallëzuar ndjeshëm, pasi Shtetet e Bashkuara të Amerikës kanë ndërmarrë një operacion ushtarak kundër forcave detare iraniane, duke shkatërruar disa mjete lundruese.
Sipas njoftimeve të Komandës Qendrore të SHBA-së dhe raportimeve të mediave ndërkombëtare si CNN, forcat amerikane kanë goditur gjashtë anije të vogla iraniane, pasi këto të fundit dyshohet se kanë hapur zjarr dhe kanë lëshuar raketa lundruese, dronë dhe mjete detare drejt anijeve ushtarake amerikane dhe atyre tregtare në zonë.
Operacioni është kryer me helikopterë luftarakë “Apashë”, të cilët kanë ndërhyrë në Ngushticën e Hormuzit, duke shkatërruar flotiljen e vogël iraniane në det të hapur, sipas burimeve ushtarake amerikane.
Nga ana tjetër, situata mbetet e paqartë, pasi raportimet janë kontradiktore. Më herët gjatë ditës, ushtria amerikane deklaroi se anije me flamur amerikan kishin kaluar pa probleme përmes ngushticës, ndërsa autoritetet iraniane e kanë mohuar këtë version, duke e quajtur “të pabazë”.
Në të njëjtën kohë, Irani dyshohet se ka kryer sulme me raketa dhe dronë ndaj disa objektivave në rajonin e Gjirit Persik, përfshirë rafineri dhe anije furnizimi në Dubai dhe Omani, ndërsa alarmet ajrore janë aktivizuar edhe në Arabinë Saudite dhe Bahrein.
Rritja e përplasjes ka ndikuar menjëherë në tregjet globale, me rritje të çmimeve të naftës dhe rënie të bursave, për shkak të frikës për bllokim të një prej rrugëve më të rëndësishme të transportit energjetik në botë.
Ndërkohë, presidenti amerikan Donald Trump ka deklaruar se forcat amerikane do të vazhdojnë të garantojnë lundrim të sigurt në zonë, duke paralajmëruar masa të mëtejshme nëse situata përshkallëzohet.
Ekspertët paralajmërojnë se nëse Ngushtica e Hormuzit mbetet e paqëndrueshme, çmimet e karburanteve në SHBA dhe më gjerë mund të pësojnë rritje të ndjeshme, me pasoja të drejtpërdrejta në ekonominë globale.
