Sipas raportimeve të Axios, duke iu referuar burimeve amerikane, Irani ka intensifikuar sërish aktivitetin e vendosjes së minave detare në Ngushticën e Hormuzit, një zonë kyçe për transportin global të energjisë.
Burimet bëjnë të ditur se njësitë detare të Gardës Revolucionare Islamike (IRGC) kanë vendosur mina të reja gjatë ditëve të fundit. Lëvizjet janë vërejtur menjëherë nga ushtria amerikane, e cila po ndjek nga afër zhvillimet në zonë.
Numri i saktë i minave të vendosura nuk është bërë publik, por para përshkallëzimit aktual vlerësohej se Irani kishte më pak se 100 mina në këtë ngushticë strategjike.
Ky konsiderohet rasti i dytë i raportuar për vendosje minash që nga fillimi i konfliktit të fundit, ndërsa mbetet e paqartë nëse të gjitha minat e vendosura më parë janë identifikuar dhe neutralizuar.
Nga ana tjetër, SHBA-të pretendojnë se një pjesë e madhe e kapaciteteve iraniane për vendosjen e minave është shkatërruar në fazat e para të konfliktit, megjithatë dyshohet se disa rezerva dhe mjete të tjera vazhdojnë të jenë funksionale përgjatë vijës bregdetare të Iranit.
