Burime iraniane, të cituara nga mediat ndërkombëtare, bëjnë të ditur se Mojtaba Khamenei po përballet me probleme serioze shëndetësore pas plagëve të marra në një sulm të mëparshëm.
Sipas raportimeve, ai ka kaluar tre ndërhyrje kirurgjikale në këmbë për shkak të djegieve dhe dëmtimeve të rënda, ndërsa në një fazë të mëvonshme pritet edhe një ndërhyrje tjetër mjekësore. Gjithashtu, thuhet se mund të ketë nevojë për vendosje proteze.
Raportet shtojnë se ai ka vështirësi në të folur dhe është tërhequr nga daljet publike, duke komunikuar shumë rrallë, ndërsa gjendja e tij mendore raportohet e qëndrueshme.
Sipas të njëjtave burime, ai është plagosur gjatë një sulmi në fund të shkurtit, ku raportohet se kanë humbur jetën edhe familjarë të tij të afërt.
Aktualisht, ai ndodhet nën kujdes të rreptë mjekësor dhe masa të larta sigurie, i rrethuar nga personel shëndetësor dhe ekipe mjekësore. Gjithashtu, raportohet se vizitat e zyrtarëve të lartë janë kufizuar për arsye sigurie.
