Një aksident i rëndë hekurudhor ka tronditur Danimarkë, ku dy trena u përplasën ballë për ballë në linjën Gribskov, në zonën e Kagerup në Zelandën Veriore.
Sipas raportimeve nga mediat vendase, përplasja ndodhi në orët e para të mëngjesit, duke shkaktuar një situatë emergjente me disa persona të plagosur rëndë. Autoritetet shëndetësore konfirmuan se të paktën katër persona ndodhen në gjendje kritike, ndërsa të tjerë kanë marrë lëndime të ndryshme.
Menjëherë pas ngjarjes, dhjetëra ekipe shpëtimi, përfshirë ambulanca dhe njësi speciale, u angazhuan në operacionet e ndihmës. Të plagosurit u transportuan drejt spitaleve, ndërsa disa prej tyre u dërguan me helikopter në Rigshospitalet për trajtim më të specializuar.
Pasagjerët që nuk pësuan lëndime u zhvendosën në një zonë të sigurt grumbullimi, ndërsa autoritetet po punojnë për të ofruar mbështetje për të gjithë të prekurit nga kjo ngjarje.
Kryetarja e bashkisë së zonës, Trine Egetved, u shpreh e tronditur nga aksidenti, duke theksuar se kjo linjë përdoret gjerësisht nga banorët, punëtorët dhe nxënësit e zonës.
Ndërkohë, policia ka nisur hetimet për të zbardhur shkaqet e përplasjes, ndërsa operacionet e shpëtimit vijojnë ende në vendngjarje.
