Një tjetër episod i diskutueshëm me sistemin VAR ka ndezur polemika në futbollin spanjoll, këtë herë në ndeshjen mes Barcelonës dhe Celta Vigos, e vlefshme për javën e 33-të të La Liga.
Skuadra katalanase arriti të fitojë minimalisht 1-0, duke ruajtur diferencën prej nëntë pikësh ndaj Real Madrid në garën për titullin. Megjithatë, ndeshja u shoqërua me polemika të forta për një vendim arbitrar që ka shkaktuar reagime të shumta.
Në minutën e 55-të, sulmuesi Ferran Torres realizoi një gol që do të dyfishonte avantazhin e Barcelonës, por festa zgjati vetëm pak sekonda. Pas ndërhyrjes së VAR-it, goli u anulua për një pozicion jashtë loje, i cili u konsiderua shumë i diskutueshëm.
Pamjet e publikuara më pas nuk arritën të japin një konfirmim të qartë për pozicionin e parregullt, duke shtuar dyshimet dhe pakënaqësinë te tifozët dhe vetë lojtarët.
Reagimi nuk mungoi as nga vetë Torres, i cili publikoi një foto të momentit në rrjetet sociale, duke ironizuar vendimin dhe duke drejtuar kritika ndaj drejtuesve të ligës, përfshirë edhe presidentin Javier Tebas.
Përveç këtij episodi, shqetësim te Barcelona ka shkaktuar edhe dëmtimi i talentit të ri Lamine Yamal, i cili u largua nga fusha gjatë ndeshjes.
Në javën e ardhshme, Barcelona do të përballet me Getafe në transfertë, në një sfidë që pritet të jetë sfiduese për skuadrën kryesuese të kampionatit.
