Komanda Qendrore e Shteteve të Bashkuara të Amerikës, US Central Command (CENTCOM), ka bërë të ditur se ka nisur një operacion të gjerë bllokade në zonën e Ngushticës së Hormuzit, duke angazhuar më shumë se 10,000 trupa ushtarake.
Sipas njoftimit zyrtar, në operacion marrin pjesë marinarë dhe pilotë amerikanë, të mbështetur nga dhjetëra anije luftarake dhe avionë ushtarakë, me qëllim kontrollin e qarkullimit detar në zonë.
Autoritetet amerikane deklarojnë se gjatë 24 orëve të para të operacionit nuk është lejuar kalimi i asnjë anijeje në zonat e përcaktuara, ndërsa disa mjete tregtare janë urdhëruar të kthehen drejt porteve në Gjirin e Omanit.
CENTCOM thekson se masat po zbatohen në mënyrë të njëjtë për të gjitha anijet, pavarësisht shtetit të origjinës, duke përfshirë edhe anije të lidhura me interesat iraniane.
Ndërkohë, sipas të dhënave të publikuara, disa anije të sanksionuara kanë arritur të kalojnë në Ngushticë, pavarësisht kufizimeve të vendosura, ndërsa situata mbetet e tensionuar në një nga rrugët më strategjike të transportit të naftës në botë.
