Ervin Salianji i ka bërë thirrje kryetarit të Partisë Demokratike, Sali Berisha, që të përballet në një garë të hapur për drejtimin e partisë, nëse është i bindur për mbështetjen që gëzon brenda saj.
I ftuar në një emision televiziv, Salianji foli edhe për mundësinë e përjashtimit të tij nga Partia Demokratike. Ai u shpreh se, edhe nëse merret një vendim i tillë, do të vazhdojë komunikimin me demokratët dhe nuk do të ndjekë rrugë ligjore brenda partisë, për të shmangur – sipas tij – përfitimet politike për Edi Ramën.
Salianji deklaroi se është i gatshëm të hyjë në garë për drejtimin e Partisë Demokratike, edhe pse kushtet aktuale, sipas tij, nuk janë të barabarta. Ai përmendi mungesën e listave të sakta të anëtarësisë, kohën e pabarabartë për kandidatët dhe përdorimin e strukturave dhe burimeve financiare të partisë në favor të Berishës.
Ai shtoi se nuk sheh arsye pse Berisha refuzon një garë të hapur, nëse është i sigurt për mbështetjen që pretendon. Salianji theksoi gjithashtu se ka arritur rezultate të mira në përballje elektorale, ndryshe nga disa figura të tjera brenda partisë që, sipas tij, kanë pësuar humbje.
“Nëse je i sigurt që ke mbështetje, dil dhe provoje me votë,” u shpreh Salianji, duke shtuar se mbetet i gatshëm për garë, edhe pse një dispozitë statutore mund ta pengojë kandidimin e tij.
