Kryeministri i Israel, Benjamin Netanyahu, ka zbuluar një strategji të re gjeopolitike që synon krijimin e një “Hexagoni” aleancash mes vendeve të Azisë, Mesdheut dhe botës arabe, me qëllim përballimin e ekstremizmit radikal shiit dhe suni në rajon.
Plani u bë publik në prag të vizitës zyrtare në Izrael të kryeministrit indian, Narendra Modi, e cila pritet të zhvillohet të mërkurën dhe konsiderohet me simbolikë të lartë strategjike.
Sipas Netanyahut, “Hexagoni” do të përfshijë Indinë, disa shtete arabe, vende afrikane, si dhe aktorë kyç të Mesdheut Lindor si Greqia dhe Qipro. Objektivi është krijimi i një boshti shtetesh me vizion të përbashkët për të frenuar ndikimin e ekstremizmit, qoftë ai i lidhur me boshtin shiit të mbështetur nga Irani dhe aleatët e tij rajonalë, ashtu edhe rrymat radikale sunite që po fitojnë terren.
Në këtë kuadër, Netanyahu përmendi edhe përpjekjet e Turqisë dhe Pakistanit për të rritur ndikimin e tyre në vende si Egjipti dhe Arabia Saudite, duke e cilësuar të domosdoshme krijimin e një kundërboshti strategjik.
Vizita e Modit do të përqendrohet në thellimin e bashkëpunimit në fushën e mbrojtjes dhe teknologjisë së avancuar. Në axhendë janë programe të përbashkëta për prodhimin e armëve, inteligjencën artificiale dhe llogaritjen kuantike. Kryeministri indian do të mbajë një fjalim në parlamentin izraelit (Knesset), do të marrë pjesë në një aktivitet inovacioni në Jeruzalem dhe do të vizitojë memorialin Yad Vashem.
Nisma e “Hexagonit” shihet si një përpjekje për të riformatuar balancat strategjike në Lindjen e Mesme dhe Mesdheun Lindor, në një kohë kur rivalitetet rajonale dhe tensionet ideologjike po thellohen.
