Gara për presidencën e FC Barcelona po ndizet edhe jashtë fushës. Kandidati Xavier Vilajoana ka bërë një premtim të fortë: nëse fiton zgjedhjet muajin e ardhshëm, do të tentojë të transferojë Harry Kane në “Camp Nou”.
Në një intervistë për ESPN, Vilajoana zbuloi se ka pasur tashmë kontakte me sulmuesin e Bayern Munich. Sipas tij, Barcelona ka nevojë urgjente për një “numër 9” klasik dhe anglezi është profili ideal për të udhëhequr repartin ofensiv.
“Ajo që na mungon është një sulmues qendre. Ka një emër konkret. Kemi bërë disa kontakte dhe mendoj se ai do të ishte një përshtatje e shkëlqyer për stilin tonë të lojës. Duke pritur situatën e tij kontraktuale te Bayern: është Harry Kane”, deklaroi kandidati.
Vilajoana theksoi se 32-vjeçari i përshtatet në mënyrë perfekte filozofisë së lojës së Barcelonës dhe la të kuptohet se lojtari ka simpati për klubin katalanas.
Megjithatë, transferimi nuk pritet të jetë i lehtë. Kane ka kontratë me Bayern Munich deri në vitin 2027 dhe ka zhvilluar bisedime të vazhdueshme me drejtorin sportiv të bavarezëve, Max Eberl. Raportimet aktuale sugjerojnë se konsensusi është që ai të vijojë në Gjermani, por interesi i Barcelonës mund të hapë një kapitull të ri në merkato.
Premtimi i Vilajoanës shihet si një lëvizje e fortë elektorale në betejën për drejtimin e klubit, duke rikthyer kujtimet e epokës së yjeve në “Camp Nou”.
