52 persona janë shoqëruar në polici pas incidenteve të regjistruara gjatë protestës së opozitës, e zhvilluar të premten para Kryeministrisë.
Burime zyrtare bëjnë me dije se nga personat e shoqëruar, 17 janë arrestuar, ndërsa 35 të tjerë janë lënë të lirë dhe po hetohen në gjendje të lirë për veprime të dyshuara gjatë tubimit.
Mbrëmjen e së premtes, Euronews Albania publikoi pamje nga Komisariati i Policisë Nr. 1 në Tiranë, ku ishin të pranishëm edhe deputetë të Partia Demokratike e Shqipërisë. Përfaqësues të kësaj force politike deklaruan se numri i protestuesve të shoqëruar ishte mbi 30 persona.
Sipas të dhënave paraprake, personat e shoqëruar dyshohet se kanë përdorur fishekzjarre dhe mjete ndezëse ndaj forcave të rendit dhe godinave institucionale.
Ndërkohë, Partia Demokratike pretendon se një prej protestuesve të ndaluar në Komisariatin Nr. 1 është dhunuar nga efektivë policie dhe se atij i është refuzuar transportimi drejt spitalit për ndihmë mjekësore.
Kryetari i grupit parlamentar të Partisë Demokratike, Gazment Bardhi, deklaroi se mes të shoqëruarve pas protestës ndodhen edhe tre të mitur si dhe një person me aftësi të kufizuara.
Autoritetet pritet të japin informacion të detajuar mbi akuzat dhe ecurinë e hetimeve në vijim.
