Hungaria ka ndërmarrë një hap të fortë politik, duke paralajmëruar bllokimin e fondeve evropiane në vlerë prej 90 miliardë eurosh për Ukrainën.
Ministri i Jashtëm hungarez, Peter Szijjarto, deklaroi se Budapesti do të bllokojë kredinë e BE-së për Kievin derisa të rifillojë tranziti i naftës drejt Hungarisë përmes tubacionit Druzhba pipeline.
Sipas tij, Ukraina po ndalon tranzitin e naftës në koordinim me Brukselin dhe opozitën hungareze, me qëllim që të krijojë presion mbi qeverinë e Budapestit dhe të ndikojë në çmimet e karburantit para zgjedhjeve.
“Ne po bllokojmë kredinë e BE-së prej 90 miliardë eurosh derisa të rifillojë tranziti i naftës. Ukraina po shkel Marrëveshjen e Asociimit me BE-në dhe po shantazhon Hungarinë”, u shpreh Szijjarto.
Qëndrim të njëjtë mbajti edhe kryeministri Viktor Orban, i cili theksoi se Hungaria nuk do të lejojë të shantazhohet përmes çështjes së energjisë.
“Derisa Ukraina të bllokojë tubacionin Druzhba, Hungaria do të bllokojë kredinë ushtarake prej 90 miliardë eurosh. Nuk duhet të jemi të shantazhuar”, deklaroi Orban.
Vendimi pritet të rrisë tensionet mes Budapestit dhe institucioneve të Bashkimit Evropian, si dhe të ndikojë në debatin mbi mbështetjen financiare dhe ushtarake për Ukrainën.
