Sekretari amerikan i Shtetit, Marco Rubio, gjatë ditës së dytë të Konferencës së Sigurisë në Mynih, u angazhua për të qartësuar qëndrimin e SHBA-së ndaj Ukrainës dhe rishikimin e synimeve të Rusisë. Rubio theksoi se Ukraina dhe siguria mbeten qendra e gravitetit të politikës transatlantike të Uashingtonit, duke paralajmëruar për lëshime “të vështira” që mund të kërkohen nga Kievi në bisedimet e ardhshme.
Në një intervistë për Bloomberg TV, Rubio tha se Rusia ka pak gjasa të arrijë objektivat fillestare të luftës dhe se ambiciet e Moskës janë ngushtuar në konsolidimin e rreth 20% të rajonit të Donjeckut që ende nuk kontrollon. Ai paralajmëroi se gjetja e një formule të pranueshme për të dy palët mbetet sfida kryesore dhe shtoi: “Mund të mos funksionojë, por SHBA do të vazhdojë të ushtrojë presion për arritjen e një marrëveshjeje.”
Në margjinat e konferencës, Rubio zhvilloi një takim rreth 40-minutësh me presidentin ukrainas Volodymyr Zelensky. Zelensky informoi Rubion mbi sulmet e vazhdueshme ruse, gjendjen në vijat e frontit dhe pasojat ndaj sistemit të energjisë. Të dy diskutuan gjithashtu për rrugën diplomatike, përfshirë bisedimet trepalëshe që do të zhvillohen javën e ardhshme në Gjenevë.
“Është e rëndësishme që negociatat e planifikuara në Gjenevë të jenë produktive dhe e falënderoj Shtetet e Bashkuara për qasjen e tyre konstruktive,” tha Zelensky, duke theksuar bashkëpunimin e vazhdueshëm të Amerikës për përfundimin e konfliktit.
Takimi i Rubio me Zelenskyn theksoi edhe një herë angazhimin e SHBA-së për stabilitet global, koordinimin me G7 dhe presionin mbi Rusinë për një zgjidhje diplomatike.
