Victor Wembanyama mori komandën e lojës në pjesën e dytë dhe u shndërrua në protagonistin absolut të fitores 100:95 të San Antonio Spurs ndaj Boston Celtics. Ylli francez realizoi një gjuajtje kyçe 1:33 minuta nga fundi dhe më pas vulosi suksesin me koshin përfundimtar, duke treguar qetësi dhe pjekuri në momentet vendimtare.
I aktivizuar sërish nga stoli, teksa Spurs po e rikthejnë gradualisht pas dëmtimit në gju, Wembanyama shënoi 16 nga 21 pikët e tij në pjesën e dytë, duke i shoqëruar me gjashtë ribaunde dhe tre bllokime.
“Mentaliteti im ishte thjesht ta mbyllja ndeshjen”, u shpreh ai pas takimit, duke theksuar karakterin e skuadrës. “Ata po luanin basketboll më të mirë, por ne qëndruam brenda lojës”.
Te San Antonio, De’Aaron Fox realizoi 21 pikë, ndërsa Keldon Johnson kontribuoi me 18 pikë dhe 10 ribaunde, në nisjen pozitive të një turi prej tre ndeshjesh në transfertë. Për Bostonin spikatën Derrick White me 29 pikë dhe nëntë ribaunde, si dhe Jaylen Brown me 27 pikë, tetë ribaunde dhe shtatë asistime.
Në Detroit, Los Angeles Clippers përmbysën një disavantazh deri në 19 pikë dhe triumfuan 98:92 ndaj Pistons. Kawhi Leonard shënoi 26 pikë, ndërsa John Collins shtoi 25, në një rikthim të fuqishëm që u konkretizua në çerekun e fundit, të fituar 30:16. Dy gjuajtjet e lira të Collins për epërsinë 93:92 dhe asistimi i James Harden për dunk-un vendimtar të Ivica Zubac vulosën suksesin e Clippers.
Pistons humbën ritmin në minutat e fundit, duke gabuar 12 nga 25 topa në çerekun final. Duncan Robinson ishte shënuesi më i mirë për Detroit me 20 pikë, në një ndeshje ku munguan disa titullarë kryesorë.
Ndërkohë, Cleveland Cavaliers reaguan fuqishëm pas humbjes së mëparshme, duke mposhtur Minnesota Timberwolves 146:134. Donovan Mitchell udhëhoqi Cavaliers me 28 pikë dhe tetë asistime, ndërsa Evan Mobley shtoi 24 pikë dhe Jaylon Tyson 23 nga stoli.
“Ata krijuan një epërsi prej 12 pikësh, por ne reaguam dhe bëmë rregullimet e duhura”, tha Mitchell.
Darius Garland realizoi 22 pikë, Sam Merrill 20 (5/6 për tri pikë), ndërsa Jarrett Allen kontribuoi me 16 pikë dhe 11 ribaunde. Për Minnesota, Anthony Edwards shënoi 25 pikë, Julius Randle 22 dhe Naz Reid 23 nga stoli. Pas kësaj ndeshjeje, Cleveland përmirësoi bilancin në 22-18, ndërsa Timberwolves ranë në 25-14.
