Tymi i dendur i shkaktuar nga qindra zjarre pyjore në Kanada ka përfshirë një pjesë të madhe të Shteteve të Bashkuara, nga Midwest deri në Verilindje, duke detyruar autoritetet të lëshojnë paralajmërime për cilësinë e rrezikshme të ajrit dhe t’u bëjnë thirrje qytetarëve të qëndrojnë brenda sa herë që të jetë e mundur.
Sipas kompanisë së monitorimit IQAir, Detroiti regjistroi të enjten cilësinë më të keqe të ajrit në botë. Nivele të rrezikshme ndotjeje u raportuan edhe në Minesota, Miçigan, Illinois verior, Ohio verior dhe provincën kanadeze të Ontarios, ndërsa qytete si Minneapolis, Milwaukee dhe Toronto u përballën me ndotje të lartë.
Në Nju Jork, qielli u mbulua nga një mjegull portokalli, ndërsa era e tymit ishte e ndjeshme në të gjithë qytetin. Autoritetet lokale u kërkuan banorëve të kufizojnë aktivitetet në ambient të hapur, veçanërisht personave me sëmundje të zemrës dhe mushkërive, grave shtatzëna, të moshuarve dhe grupeve të tjera të rrezikuara.
Situata ka ngritur shqetësime edhe për finalen e Kupës së Botës FIFA, e cila do të zhvillohet të dielën në Nju Xhersi, ku priten mbi 80 mijë tifozë.
“Sot pritet të jetë dita më e rëndë e kësaj vale tymi”, deklaroi kryebashkiaku i Nju Jorkut, Zohran Mamdani, duke njoftuar se qyteti po shpërndan maska KN95 falas në biblioteka, komisariate policie dhe stacione zjarrfikësish.
Sipas autoriteteve kanadeze, deri të enjten në mëngjes ishin aktive 858 zjarre, prej të cilave 111 mbeteshin jashtë kontrollit. Vatrat më të mëdha ndodhen në provincat Manitoba, Saskatchewan dhe Ontario.
Deri tani, rreth 2.4 milionë hektarë janë përfshirë nga flakët gjatë sezonit aktual të zjarreve. Ekspertët e klimës paralajmërojnë se rritja e temperaturave globale po ndikon në shtimin e frekuencës dhe intensitetit të zjarreve pyjore.
Tymi nga këto zjarre konsiderohet më i rrezikshëm se ndotja e zakonshme e ajrit, pasi mund të qëndrojë në atmosferë për javë të tëra dhe të udhëtojë mijëra kilometra. Studimet e lidhin ekspozimin ndaj tij me rrezik më të lartë për infarkt, goditje në tru, kancer, komplikime gjatë shtatzënisë dhe dobësim të sistemit imunitar.
