Finalja e Kupës së Botës 2026 pritet të jetë jo vetëm një betejë e madhe sportive, por edhe një nga shfaqjet më madhështore muzikore të viteve të fundit. Organizatorët kanë zbuluar një listë të jashtëzakonshme artistësh që do të performojnë në ceremoninë e mbylljes së turneut më të madh të futbollit botëror.
Në skenën e finales do të ngjiten disa nga emrat më të mëdhenj të industrisë së muzikës, mes tyre Justin Bieber, Shakira, Madonna dhe grupi i famshëm koreano-jugor BTS. Ceremonia do të zhvillohet më 19 korrik në stadiumin e New Jersey-t, ndërsa performanca spektakolare pritet të zgjasë rreth 11 minuta.
Spektaklit do t’i bashkohen edhe yje të tjerë ndërkombëtarë, përfshirë këngëtarin nigerian Burna Boy, i cili do të interpretojë hitin e tij “Dai Dai”, dirigjentin e njohur botëror Gustavo Dudamel, si dhe korin amerikan PS22, duke sjellë një kombinim të muzikës pop, ritmeve globale dhe elementeve klasike.
Ceremonia e finales nuk do të jetë vetëm një festë muzikore, por do të ketë edhe një mision humanitar. Aktiviteti do të mbështesë FIFA Global Citizen Education Fund, një fondacion që synon të mbledhë rreth 100 milionë dollarë për të krijuar më shumë mundësi arsimimi dhe për të nxitur zhvillimin e futbollit te fëmijët në të gjithë botën.
Justin Bieber ka shprehur entuziazmin e tij për pjesëmarrjen në këtë ngjarje, duke theksuar se është i lumtur që performanca e tij lidhet edhe me një kauzë sociale.
“Jam mirënjohës që do të jem pjesë e këtij spektakli dhe akoma më i lumtur që kjo nismë po ndihmon në zgjerimin e mundësive për arsimimin e fëmijëve në mbarë botën”, është shprehur këngëtari kanadez.
Me një kombinim të futbollit, muzikës dhe një mesazhi humanitar, finalja e Botërorit 2026 pritet të shndërrohet në një nga eventet më të mëdha globale të vitit.
