FIFA ka reaguar ndaj akuzave të shumta për manipulim të ndeshjeve në Kupën e Botës 2026, pas polemikave të krijuara veçanërisht nga eliminimi i Egjiptit përballë Argjentinës në fazën e 1/8-ave.
Kritikat u shtuan pas humbjes dramatike të kombëtares egjiptiane me rezultatin 3-2 ndaj Argjentinës, ku lojtarë dhe përfaqësues të Egjiptit pretenduan se disa vendime të gjyqtarëve ndikuan drejtpërdrejt në rezultatin e takimit.
Një nga reagimet më të forta erdhi nga futbollisti egjiptian Ziko, i cili deklaroi se Argjentina ishte favorizuar dhe se “Kupa e Botës ishte e kurdisur”. Këto deklarata sollën një valë diskutimesh në opinionin sportiv ndërkombëtar.
Në mbrojtje të integritetit të arbitrimit doli kreu i departamentit të gjyqtarëve të FIFA-s, Pierluigi Collina, i cili hodhi poshtë akuzat pa prova dhe theksoi se vendimet e gjyqtarëve nuk mund të ndikohen nga askush.
“Diskutimi konstruktiv për vendimet e arbitrave është pjesë e futbollit, por akuzat e pabazuara nuk kanë vend në sportin tonë. Askush nuk mund të vërë në dyshim integritetin e gjyqtarëve në Kupën e Botës. Këto pretendime mund të çojnë edhe në kërcënime ndaj tyre dhe familjeve të tyre, dhe kjo nuk është e pranueshme”, deklaroi Collina.
Ish-gjyqtari italian theksoi gjithashtu se as presidenti i FIFA-s, Gianni Infantino, nuk ka asnjë ndikim mbi vendimmarrjen e arbitrave.
“Askush nuk mund të pretendojë se arbitrimi i FIFA-s mund të ndikohet nga dikush, madje as nga presidenti i FIFA-s. Infantino gjithmonë ka mbështetur punën e ekipit të gjyqtarëve dhe na ka dhënë pavarësi të plotë në punën tonë”, u shpreh Collina.
Ai analizoi edhe dy momentet më të kontestuara nga ndeshja Argjentinë–Egjipt dhe shpjegoi arsyetimin e përdorimit të sistemit VAR.
Sipas Collinës, pas çdo goli të shënuar, VAR kontrollon të gjithë fazën e posedimit sulmues, për të parë nëse ka pasur ndonjë faull gjatë aksionit që ka ndikuar në gol. Ai theksoi se nuk ekziston një kufizim i përcaktuar për distancën nga porta apo kohën që ka kaluar nga momenti i kontaktit deri te goli.
Si shembull, ai iu referua një episodi ku lojtari egjiptian Marëan Attia dyshohet se shkeli në këmbën e mbrojtësit argjentinas Lisandro Martínez.
“Ne besojmë se një faull është faull. Nëse një kontakt i parregullt nuk është parë nga gjyqtari në fushë, VAR ka të drejtë të ndërhyjë dhe të rekomandojë rishikimin e situatës”, shpjegoi Collina.
Sa i përket golit të tretë të Argjentinës, i cili u kundërshtua nga egjiptianët, kreu i arbitrave të FIFA-s tha se VAR nuk konstatoi asnjë shkelje në fazën përgatitore të aksionit.
Ai sqaroi edhe një tjetër moment të diskutuar, ku Egjipti pretendoi për penallti pas një kontakti mes Mohamed Salah dhe sulmuesit argjentinas Julián Álvarez.
Sipas Collinës, gjyqtari dhe sistemi VAR e konsideruan kontaktin si një përplasje normale gjatë lojës dhe jo si faull.
Reagimi i FIFA-s vjen në një moment kur polemikat për arbitrimin në Kupën e Botës janë shtuar, ndërsa organizmi ndërkombëtar kërkon të mbrojë besueshmërinë e teknologjisë VAR dhe pavarësinë e gjyqtarëve.
Ndërkohë, Federata Egjiptiane e Futbollit ka dorëzuar një ankesë zyrtare në FIFA, duke kërkuar shqyrtimin e vendimeve të marra gjatë sfidës me Argjentinën.
