Një valë e madhe sulmesh me dronë ka tronditur gjatë natës kryeqytetin rus dhe zonat përreth tij, pasi mbrojtja ajrore e Rusisë zbuloi më shumë se 430 mjete pa pilot që dyshohet se ishin nisur drejt rajonit të Moskës.
Kryebashkiaku i Moskës, Sergei Sobyanin, deklaroi se shumica e dronëve u neutralizuan në distancë të largët, përpara se të arrinin pranë kryeqytetit rus. Sipas tij, 36 prej tyre u shkatërruan gjatë afrimit drejt Moskës.
Sulmi masiv vjen pas një serie operacionesh të intensifikuara nga Kievi kundër objektivave në territorin rus, me përdorimin e dronëve me rreze të gjatë veprimi.
Ministria ruse e Mbrojtjes njoftoi gjithashtu se gjatë mbrëmjes së të dielës ndaj territorit rus ishin nisur rreth 625 dronë sulmues, nga të cilët 613, sipas autoriteteve ruse, u rrëzuan nga sistemet e mbrojtjes ajrore.
Deri tani nuk janë raportuar detaje të plota mbi dëmet e shkaktuara nga sulmet e fundit, ndërsa autoritetet ruse vijojnë të deklarojnë se mbrojtja ajrore ka parandaluar depërtimin e shumicës së mjeteve pa pilot.
Sulmet me dronë janë kthyer në një element të rëndësishëm të përballjes mes Rusisë dhe Ukrainës, me të dyja palët që kanë intensifikuar përdorimin e tyre për goditje ndaj objektivave ushtarake dhe infrastrukturore.
