Një vendim i fortë i autoriteteve shqiptare ka vënë në qendër të vëmendjes Ikballe Hudutin, shtetasen nga Kosova e cila është bërë pjesë e protestave qytetare të zhvilluara së fundmi në Tiranë. Sipas urdhrit të lëshuar për zbatim nga institucionet përkatëse, Huduti është shpallur person i padëshiruar në Shqipëri dhe nuk do të lejohet të hyjë në territorin shqiptar për një periudhë 15-vjeçare.
Në dokumentacionin që i është përcjellë Policisë së Shtetit, masa justifikohet me argumentin se prania dhe aktiviteti i saj përbëjnë kërcënim për sigurinë kombëtare, rendin publik dhe interesat e vendit.
Vendimi vjen në të njëjtën ditë kur kryeministri Edi Rama reagoi publikisht ndaj figurës së Hudutit, duke e përshkruar atë jo si një protestuese, por si një person që, sipas tij, ka përfituar nga kauzat ku është përfshirë.
Në një postim publik, Rama akuzoi Hudutin dhe persona të tjerë të ngjashëm se përpiqen të ndikojnë te të rinjtë protestues duke përhapur, sipas tij, “helm urrejtjeje” ndaj Shqipërisë dhe institucioneve të saj.
Kryeministri shoqëroi reagimin e tij me fotografi të Hudutit, duke pretenduar se ajo ka shprehur qëndrime armiqësore ndaj Shteteve të Bashkuara të Amerikës për shkak të vrasjes së vëllait të saj, të cilin Rama e identifikoi si pjesë të strukturave të regjimit iranian.
Po ashtu, ai publikoi një tjetër fotografi ku Huduti shfaqet pranë ish-presidentit të Iranit, Mahmoud Ahmadinejad, figurë të cilën Rama e cilësoi si një nga bashkëpunëtorët kryesorë të udhëheqjes fetare iraniane.
Vendimi për shpalljen e saj “non grata” pritet të nxisë debate politike dhe publike, ndërsa autoritetet shqiptare argumentojnë se masa është marrë në funksion të mbrojtjes së sigurisë kombëtare dhe rendit publik.
