Bordi i Transparencës ka publikuar këtë të mërkurë, më 17 qershor, çmimet e reja të karburanteve që do të aplikohen në tregun shqiptar, duke sjellë një ulje të çmimit për naftën dhe benzinën.
Sipas vendimit të fundit, çmimi maksimal i shitjes me pakicë për gazoilin sipas standardit SSH EN 590 është përcaktuar në 176 lekë për litër, ndërsa çmimi i shitjes me shumicë nuk duhet të kalojë 164 lekë për litër.
Ndërkohë, për benzinën, çmimi maksimal i shitjes me pakicë është vendosur në 166 lekë për litër, ndërsa ai i shitjes me shumicë në 154 lekë për litër.
Bordi bëri me dije se çmimet e reja do të hyjnë në fuqi sot, më 17 qershor, në orën 13:00 dhe do të mbeten në fuqi deri në vendimin e radhës, kur do të rishikohen në varësi të luhatjeve të tregut ndërkombëtar të hidrokarbureve.
Vendimi pritet të sjellë një lehtësim për konsumatorët dhe sektorët që varen nga karburantet, pas luhatjeve të vazhdueshme të çmimeve në treg.
