Kryeministri Edi Rama reagoi ndaj debateve për projektin turistik në Zvërnec, duke mohuar kategorikisht pretendimet se shteti shqiptar po fal prona publike investitorëve privatë.
Gjatë fjalës së mbajtur në prezantimin e kompanisë teknologjike “Albanian Digital Solution”, Rama i cilësoi këto raportime si “lajm të rremë”, ndërsa theksoi se prona në Zvërnec është private dhe nuk i përket shtetit.
Sipas kreut të qeverisë, investitorët që kanë marrë përsipër zhvillimin e projektit janë “tejet seriozë” dhe e kanë blerë tokën nga pronarë privatë.
Rama u ndal edhe te roli i Korporata Shqiptare e Investimeve, duke deklaruar se qeveria po ndjek një qasje të re për administrimin e pronave publike, me synim kthimin e tyre në asete zhvillimi ekonomik për shtetin shqiptar.
Ai tha se korporata ka krijuar një portofol investimesh me vlerë rreth gjysmë miliard euro, duke synuar përdorimin e pronave publike për projekte zhvillimore dhe jo më “dhënie të tyre për hiçasgjë”.
Kryeministri sqaroi gjithashtu se shteti shqiptar ka pronësi vetëm mbi ishullin e Sazanit, pjesë e zonës së projektit, ku sipas tij negociatat ende nuk kanë përfunduar.
“Shteti nuk po fal asgjë. Zvërneci është pronë private dembabadem, ndërsa toka në ishullin e Sazanit është pronë e shtetit shqiptar”, deklaroi Rama.
