Organizata ndërkombëtare Reporterët pa Kufij ka reaguar ashpër ndaj deklaratave të kryeministrit Edi Rama, pas publikimit të raportit më të fundit mbi lirinë e medias, ku Shqipëria renditet në vendin e 83-të, duke shënuar një rënie me tre pozicione krahasuar me një vit më parë.
Në reagimin e tyre, “Reporterët pa Kufij” theksojnë se ky vlerësim nuk lidhet me mënyrën se si qeveria komunikon me publikun, por me realitetin e ushtrimit të lirisë së shtypit në terren.
“Zoti Kryeministër Edi Rama, ne masim lirinë e medias, jo komunikimin e qeverisë,” thuhet në deklaratë, duke nënvizuar se metodologjia e indeksit bazohet në tregues të pavarur dhe jo në perceptime politike.
Sipas organizatës, rënia e Shqipërisë në renditje pasqyron disa probleme të theksuara strukturore, përfshirë presionin politik ndaj mediave, përdorimin e institucioneve të zbatimit të ligjit në mënyrë të diskutueshme, mungesën e transparencës në pronësinë mediatike dhe rastet e kërcënimeve ndaj gazetarëve.
Reporterët pa Kufij theksojnë gjithashtu se këta faktorë ndikojnë drejtpërdrejt në klimën e punës së gazetarëve dhe në aftësinë e tyre për të raportuar në mënyrë të pavarur.
Raporti i fundit ka nxitur debat të gjerë politik në Shqipëri, veçanërisht pas reagimeve të qeverisë, e cila ka kundërshtuar disa nga konkluzionet e tij.
Organizata ndërkombëtare, megjithatë, ka qëndruar në vlerësimin e saj, duke theksuar se treguesit e përdorur janë të bazuar në të dhëna dhe analiza shumëdimensionale mbi gjendjen e lirisë së medias në vend.
