Vetëm një muaj para startit të Kupa e Botës FIFA 2026, atmosfera rreth turneut më të madh të futbollit në planet është ndezur nga polemika, tensione politike dhe çmime marramendëse.
Nga biletat që kapin miliona dollarë në tregun e zi, te pasiguria për pjesëmarrjen e Iranit dhe shqetësimet për sigurinë në Shtetet e Bashkuara, FIFA po përballet me një nga edicionet më të debatueshme në histori.
Biletat “fluturojnë” në qiell
Çmimet e biletave kanë shkaktuar zemërim te tifozët. Për ndeshjen hapëse të SHBA-së ndaj Paraguait, biletat më të lira kanë kaluar 1 mijë dollarë, ndërsa për finalen çmimet kanë arritur deri në 32 mijë dollarë.
Në tregun e rishitjes situata është edhe më ekstreme. Disa bileta për finalen po shiten për shifra marramendëse, madje një tifoz ka nxjerrë një biletë në shitje për mbi 11 milionë dollarë.
Edhe Donald Trump ironizoi situatën: “As unë nuk do t’i paguaja këto çmime”.
Misteri i Iranit
Një tjetër çështje e nxehtë është pjesëmarrja e Iranit në Botëror, për shkak të tensioneve me SHBA-në.
U diskutua madje mundësia që ndeshjet e Iranit të zhvilloheshin në Meksikë dhe jo në territor amerikan, ndërsa qarkulluan edhe spekulime për zëvendësimin e Iranit me Itali.
Megjithatë, gjithçka tregon se Irani do të marrë pjesë normalisht në turne.
Frika për sigurinë
Shqetësimet për sigurinë janë shtuar ndjeshëm pas operacioneve federale kundër karteleve në Meksikë dhe masave të forta të emigracionit në SHBA.
Protestat në Mexico City dhe tensionet në zonën e Guadalaharës kanë ngritur pikëpyetje të mëdha për organizimin e turneut.
Debutuesit që duan historinë
Katër skuadra do të marrin pjesë për herë të parë në një Botëror: Jordani, Kepi i Gjelbërt, Kuraçao dhe Uzbekistan.
Ata do të përballen me gjigantë si Argjentinë, Portugali, Spanjë dhe Gjermani.
Messi dhe Ronaldo, vallë për herë të fundit?
Tifozët presin me emocione rikthimin në skenën botërore të Lionel Messi dhe Cristiano Ronaldo, të cilët mund të luajnë Botërorin e fundit të karrierës.
Ndërkohë, disa yje të rinj si Lamine Yamal rrezikojnë të mungojnë për shkak dëmtimesh, duke shtuar edhe më shumë dramat para nisjes së turneut.
