Irani ka njoftuar rihapjen e plotë të kalimit detar në një nga korridoret më strategjike të transportit global, Ngushtica e Hormuzit, duke lejuar lëvizjen e anijeve tregtare gjatë periudhës së armëpushimit në rajon.
Vendimi u bë publik nga ministri i Jashtëm iranian, Abbas Araghchi, i cili deklaroi se hapja e korridorit detar vjen në përputhje me marrëveshjet e armëpushimit të shpallura në rajon dhe do të jetë e vlefshme deri në përfundimin e tij.
Sipas deklaratës së publikuar në rrjetin social X, kalimi për të gjitha anijet tregtare do të jetë i lirë dhe i koordinuar përmes autoriteteve detare iraniane, duke synuar normalizimin e qarkullimit në këtë rrugë kyçe të tregtisë globale të naftës dhe mallrave.
Autoritetet iraniane theksuan se ky vendim është pjesë e masave të dakorduara në kuadër të armëpushimit dhe synon të ulë tensionet në një nga zonat më të ndjeshme gjeopolitike në botë.
