Gjykata e Posaçme kundër Korrupsionit dhe Krimit të Organizuar (GJKKO) ka shpallur fajtor deputetin e Partisë Demokratike Bardh Spahia, duke e dënuar atë me gjobë për veprën penale “pengim i ekzekutimit të vendimit të gjykatës”.
Sipas vendimit të shpallur këtë të premte, Spahia është dënuar me 100 mijë lekë gjobë, ndërsa Prokuroria e Posaçme (SPAK) kishte kërkuar një masë më të rëndë ndëshkimi, konkretisht 700 mijë lekë gjobë.
Çështja ndaj tij ka nisur pas një kallëzimi të bërë nga ish-drejtori i Ujësjellësit të Shkodrës, Mark Molla, i cili pretendonte se ishte shkarkuar nga detyra në mënyrë të padrejtë. Sipas tij, pavarësisht një vendimi të formës së prerë të gjykatës që urdhëronte rikthimin në detyrë, vendimi nuk ishte zbatuar.
Hetimet kanë konstatuar se në kohën kur Bardh Spahia ushtronte detyrën e kryetarit të Bashkisë Shkodër, nuk është zbatuar vendimi gjyqësor për rikthimin në detyrë të kallëzuesit, duke çuar në procedimin penal dhe më pas në shpalljen e tij fajtor.
Vendimi i GJKKO-së vjen pas shqyrtimit gjyqësor dhe argumenteve të palëve, ndërsa mbrojtja dhe akuza kishin qëndrime të ndryshme për përgjegjësinë konkrete në këtë rast.
