Qeveria shqiptare ka hedhur në tryezë një paketë të re mbështetëse për sektorin e transportit publik, duke propozuar kompensim prej 50 lekësh për litër naftë për të gjithë operatorët në vend, në një periudhë 3-mujore. Masa u diskutua gjatë një takimi me përfaqësues të Shoqata Kombëtare e Transportit Qytetas dhe Shoqata Kombëtare e Transportit Urban dhe Ndërqytetas, në kushtet e rritjes së fortë të çmimeve të karburantit.
Megjithatë, operatorët e sektorit e konsiderojnë këtë mbështetje të pamjaftueshme. Ata kërkojnë një subvencion prej 100 lekësh për litër, duke iu referuar një skeme të ngjashme të zbatuar në vitin 2022 gjatë krizës së çmimeve të energjisë.
Kreu i Shoqatës së Transportit Qytetas, Kostandin Foni, u shpreh se propozimi aktual nuk mbulon kostot reale të operimit, të cilat janë rritur ndjeshëm. Megjithatë, ai e cilësoi si një hap pozitiv fillestar për të shmangur ndërprerjen e shërbimit.
“Në ditët në vijim presim diskutime të mëtejshme me ministrat për të trajtuar kostot e transportit falas dhe për të shqyrtuar kërkesat tona kryesore, si heqja e akcizës dhe ulja e TVSH-së për karburantin,” deklaroi Foni.
Sektori i transportit publik ndodhet në një situatë kritike financiare, e përkeqësuar që prej pandemisë së COVID-19. Rritja e çmimit të naftës ka krijuar një hendek të madh mes kostove të operimit dhe të ardhurave, ndërkohë që tarifat për qytetarët mbeten të pandryshuara.
Vetëm një ditë më parë, operatorët reduktuan shërbimin deri në 60% në të gjithë vendin, duke paralajmëruar për masa më të forta nëse nuk do të ketë ndërhyrje konkrete nga institucionet.
Në këtë kontekst, përfaqësuesit e sektorit kanë dorëzuar një paketë të plotë antikrizë, e cila përfshin jo vetëm kompensimin e drejtpërdrejtë të karburantit, por edhe masa fiskale si pezullimi i taksës së qarkullimit, heqja e akcizës dhe reduktimi ose eliminimi i TVSH-së për këtë sektor.
Sipas tyre, këto masa janë të domosdoshme për të garantuar vijimësinë e një shërbimi jetik për qytetarët dhe për të shmangur kolapsin e transportit publik në vend.
