NASA ka publikuar imazhet e para me cilësi të lartë të Tokës, të realizuara nga ekuipazhi i misionit Artemis II, ndërsa anija kozmike Orion po vazhdon udhëtimin drejt Hënës.
Komandanti i misionit, Reid Wiseman, i përshkroi pamjet si mbresëlënëse, duke theksuar bukurinë unike të planetit tonë të parë nga hapësira.
Ky mision, i realizuar në bashkëpunim me Canadian Space Agency, shënon një moment historik, pasi rikthen njerëzit në trajektoren drejt Hënës për herë të parë pas më shumë se 50 vitesh. Ndryshe nga misionet e uljes, Artemis II ka për qëllim testimin e sistemeve kryesore të Orionit, përfshirë navigimin, komunikimin dhe sigurinë e ekuipazhit, si një hap përgatitor për misionet e ardhshme.
Një nga fotot e para, e quajtur “Përshëndetje, Botë”, paraqet një pamje spektakolare të Oqeanit Atlantik, të rrethuar nga një shtresë e hollë atmosferike dhe drita të gjelbra aurorale në të dy polet. Në këtë imazh dallohen qartë pjesë të Afrikës Veriperëndimore dhe gadishulli Iberik, ndërsa në anën tjetër shtrihet Amerika e Jugut.
Katër astronautët në bord janë tashmë mbi 200 mijë milje larg Tokës dhe po i afrohen Hënës. Më 6 prill, ata pritet të zhvillojnë një vëzhgim disaorësh të sipërfaqes hënore, ku do të kenë mundësi të shohin një pjesë të anës së largët të saj të ndriçuar nga Dielli.
Gjatë këtij vëzhgimi, ekuipazhi do të identifikojë formacione të rëndësishme gjeologjike si pellgu Orientale dhe disa kratere të njohura, duke ofruar një perspektivë të rrallë që nuk është parë më parë drejtpërdrejt nga astronautët.
