Fati i njërit prej pilotëve amerikanë të avionit luftarak F-15, i rrëzuar të premten në Iran gjatë misioneve ajrore, mbetet ende i panjohur.
Forcat amerikane dhe ato iraniane janë angazhuar në një garë intensive për gjetjen e pilotit të dytë, pas rrëzimit të avionit pranë qytetit Lali, rreth 180 kilometra nga kufiri me Irakun. Sipas raportimeve, avioni është goditur nga mbrojtja kundërajrore iraniane.
Një nga anëtarët e ekuipazhit është shpëtuar me sukses në një operacion të shpejtë, ndërsa për pilotin tjetër nuk ka ende asnjë informacion të konfirmuar. Ndërkohë, autoritetet iraniane kanë shpallur një shpërblim prej 60 mijë dollarësh për kapjen e tij, nëse rezulton i gjallë.
Në të njëjtën kohë, SHBA po vijon operacionet e kërkim-shpëtimit me mjete ajrore në zonë, ndërsa tensionet në rajon mbeten të larta.
Rrëzimi i këtij avioni shënoi një ditë të rëndë për Pentagonin, pasi u konfirmua edhe humbja e një avioni tjetër, A-10 Warthog, i cili u rrëzua pranë Ngushtica e Hormuzit. Në këtë rast, piloti arriti të katapultohej dhe u shpëtua.
Ndërkohë, situata në Lindjen e Mesme vijon të përshkallëzohet me sulme të reja. Goditje ajrore izraelite kanë shënjestruar edhe zonën pranë centralit bërthamor të Bushehrit, ndërsa tensionet janë rritur edhe në veri të Izraelit, ku janë aktivizuar sistemet e mbrojtjes raketore pas sulmeve nga Irani dhe Libani.
Në planin diplomatik, autoritetet iraniane kanë sinjalizuar gatishmëri për negociata për përfundimin e konfliktit, por vetëm nëse hiqen sanksionet dhe njihet e drejta e tyre për një program bërthamor për qëllime paqësore. Deri atëherë, situata në Gjirin Persik mbetet e tensionuar dhe e pasigurt.
