Drejtuesi i Strukturës së Posaçme kundër Korrupsionit dhe Krimit të Organizuar (SPAK), Klodian Braho, së bashku me prokurorët Dorina Bejko dhe Vladimir Mara, kanë nisur një vizitë zyrtare në Shtetet e Bashkuara të Amerikës.
Kjo shënon vizitën e parë zyrtare të Brahos në SHBA që prej marrjes së detyrës në krye të SPAK. Vizita konsiderohet pjesë e bashkëpunimit të vazhdueshëm me partnerët amerikanë, me fokus të veçantë luftën kundër krimit të organizuar dhe trafikut të lëndëve narkotike.
Ky angazhim vjen pas kontakteve dhe takimeve të mëparshme të drejtuesve të SPAK, përfshirë edhe ish-kreun Altin Dumani, të cilat kanë shërbyer për forcimin e koordinimit me autoritetet amerikane në hetimet ndërkombëtare dhe goditjen e rrjeteve kriminale.
