Kryeministri izraelit, Benjamin Netanyahu, iu drejtua kombit me një mesazh të qartë pas valës së sulmeve ajrore dhe zhvillimeve diplomatike në Lindjen e Mesme. Ai theksoi se, megjithë arritjet ushtarake, konflikti me Iran nuk ka përfunduar.
“Është e vërtetë: Irani është më i dobët se kurrë, dhe Izraeli më i fortë se kurrë. Por kjo nuk është fundi i fushatës,” tha Netanyahu, duke përkujtuar viktimat izraelite dhe duke nënvizuar vendosmërinë e vendit të tij për të arritur objektivat e mbetura.
Ai gjithashtu falënderoi presidentin amerikan, Donald Trump, për “udhëheqjen dhe mbështetjen e palëkundur”, duke theksuar se bashkëpunimi SHBA-Izrael po ndryshon rrënjësisht dinamikën në Lindjen e Mesme.
Netanyahu deklaroi se materiali bërthamor i Iranit do të nxirret ose përmes marrëveshjeve, ose përmes fitores ushtarake, dhe se raketat iraniane aktuale janë vetëm nga stoqet ekzistuese, duke vënë në pah dobësinë strategjike të Teheranit.
Ky qëndrim vjen pak pas arritjes së një armëpushimi dy-javor midis SHBA-së dhe Iranit, të cilin Izraeli e konsideron të pjesshëm dhe nuk e përfshin Libanin, ku tensionet vazhdojnë të jenë të larta.
Netanyahu përfundoi fjalimin duke paralajmëruar se Izraeli do të vazhdojë të mbrojë interesat e tij kombëtare dhe të ndjekë objektivat strategjike deri në fund të konfliktit.
