Kryebashkiaku i Nju Jorkut, Zohran Mamdani, ka kritikuar ashpër sulmet ushtarake të Shteteve të Bashkuara dhe Izraelit ndaj Iranit, duke i cilësuar si një “përshkallëzim katastrofik” të konfliktit në Lindjen e Mesme.
Në një postim në rrjetin social X, Mamdani theksoi se bombardimet po prekin qytete dhe civilë, dhe paralajmëroi se hapja e një fronti të ri lufte mund të ketë pasoja të rënda. Ai shtoi se amerikanët kërkojnë zgjidhje për krizën ekonomike dhe jo një konflikt të ri për ndryshim regjimi.
Qëndrimi i tij ka shkaktuar reagime të forta politike: figura konservatore e kanë akuzuar për qëndrim pro-Iranit, ndërsa organizata të majta, si Democratic Socialists of America, e mbështetën, duke theksuar nevojën për paqe dhe stabilitet.
Pas sulmeve ndaj Iranit, autoritetet e Nju Jorkut kanë rritur masat e sigurisë në zonat strategjike të qytetit, duke përfshirë Manhattan dhe Brooklyn, për të parandaluar çdo incident të mundshëm.
