Irani ka konfirmuar se nuk do të marrë pjesë në Kupën e Botës 2026, duke kthyer sportin në një tjetër front përplasjesh politike me Shtetet e Bashkuara. Vendimi i Teheranit vjen pavarësisht përpjekjeve të presidentit të FIFA-s, Gianni Infantino, për të ndërmjetësuar dhe për të shmangur një bojkot që do të trondiste turneun më të madh të futbollit në botë.
Turneu i ardhshëm i FIFA World Cup 2026 do të organizohet në tre vende pritëse – United States, Mexico dhe Canada – por tensionet gjeopolitike kanë prishur çdo mundësi kompromisi.
Infantino bëri të ditur se kishte zhvilluar bisedime me presidentin amerikan Donald Trump për situatën dhe pjesëmarrjen e Iranit në turne.
“Fola me Trumpin rreth situatës aktuale në Iran dhe faktit që ekipi iranian është kualifikuar për Kupën e Botës. Presidenti përsëriti se ekipi iranian është i mirëpritur të garojë në Shtetet e Bashkuara. Të gjithë kemi nevojë për një ngjarje si Kupa e Botës për të bashkuar njerëzit më shumë se kurrë”, deklaroi kreu i FIFA-s.
Megjithatë, autoritetet iraniane e hodhën poshtë këtë mundësi. Ministri i Sportit i Iranit, Ahmad Doyanmali, tha se vendimi për bojkot është përfundimtar dhe lidhet drejtpërdrejt me tensionet politike dhe ushtarake me SHBA-në.
“Meqenëse kjo qeveri e korruptuar ka vrarë udhëheqësin tonë, nuk ekziston asnjë kusht që ne të marrim pjesë në Kupën e Botës”, deklaroi ai në një intervistë për agjencinë gjermane DPA.
Sipas Doyanmali, Irani ka kaluar muaj shumë të vështirë për shkak të konflikteve të fundit në rajon. Ai tha se vendi është përballur me dy luftëra brenda më pak se një viti dhe se mijëra qytetarë iranianë kanë humbur jetën, gjë që e bën të pamundur pjesëmarrjen në një event sportiv të organizuar nga një vend që Teherani e konsideron përgjegjës për përshkallëzimin e krizës.
Ministri iranian la të kuptohet gjithashtu se, nëse një vend tjetër do të kishte qenë organizator i turneut në rrethana të tilla, komuniteti ndërkombëtar mund të kishte reaguar duke rishikuar të drejtat e organizimit të Kupës së Botës.
Vendimi i Iranit pritet të ndezë debate të forta në botën e futbollit dhe diplomacisë, pasi përplasjet politike po rrezikojnë të përfshijnë drejtpërdrejt edhe skenën më të madhe të sportit global.
