Presidentja e Komisioni Evropian, Ursula von der Leyen, deklaroi se bota po hyn në një fazë të re të zhvillimit të energjisë bërthamore, duke theksuar se gara globale për këtë teknologji tashmë ka nisur.
Gjatë një deklarate për rolin e Evropës në këtë sektor strategjik, ajo nënvizoi se kontinenti ka kapacitete të konsiderueshme për t’u shndërruar në një nga liderët kryesorë botërorë në energjinë bërthamore.
Sipas saj, industria bërthamore në Evropë është tashmë e zhvilluar dhe përbën një bazë të fortë për avancime të mëtejshme. Aktualisht, rreth 500 mijë profesionistë të kualifikuar punojnë në këtë sektor në kontinent, një numër që, sipas saj, tejkalon edhe atë të Shtetet e Bashkuara dhe Kinë.
Von der Leyen theksoi se inovacioni teknologjik do të jetë vendimtar për të ardhmen e energjisë bërthamore. Një nga drejtimet kryesore të zhvillimit janë reaktorët modularë të vegjël, të cilët konsiderohen më fleksibël, më të sigurt dhe më të shpejtë për t’u ndërtuar krahasuar me centralet tradicionale.
Sipas saj, këto teknologji mund të luajnë një rol të rëndësishëm në prodhimin e energjisë së qëndrueshme dhe në reduktimin e varësisë nga burimet fosile.
Në këtë kuadër, Von der Leyen bëri thirrje për më shumë investime në kërkim shkencor, zhvillim teknologjik dhe bashkëpunim mes vendeve evropiane. Qëllimi, sipas saj, është që Evropa të shndërrohet në një qendër globale për zhvillimin e teknologjive bërthamore të gjeneratës së re, duke forcuar njëkohësisht sigurinë energjetike dhe përpjekjet kundër ndryshimeve klimatike.
