Parlamenti Evropian pritet të votojë të martën një raport mbi punën vjetore të Bankës Qendrore Evropiane (BQE), ku përfshihet një pasazh që mbështet hapur projektin për euron digjitale. Edhe pse dokumenti nuk ka fuqi legjislative, votimi do të shërbejë si tregues politik për nivelin e mbështetjes ndaj kësaj nisme strategjike.
Euroja digjitale parashikohet të jetë një formë elektronike e parasë publike, e lëshuar drejtpërdrejt nga BQE, që do të plotësojë paratë cash dhe shërbimet e pagesave të ofruara nga bankat komerciale. Ajo do t’u mundësonte qytetarëve përdorimin e një forme digjitale të parasë së bankës qendrore, përmes një portofoli digjital që mund të funksionojë si online ashtu edhe offline.
Sipas propozimit të Komisionit Evropian, sistemi do të garantojë qasje universale në pagesa dhe nivele të larta privatësie, përfshirë mundësinë e transaksioneve jashtë linje që nuk gjurmohen. Nisma ka marrë peshë të veçantë në kontekstin e tensioneve ekonomike BE–SHBA, pasi synon të reduktojë varësinë nga gjigantët amerikanë të pagesave si Visa dhe Mastercard, që dominojnë tregun evropian.
Megjithatë, brenda Parlamentit Evropian ka ndarje për dizajnin përfundimtar të projektit. Raportuesi kryesor, eurodeputeti spanjoll Fernando Navarrete, ka propozuar një version më të kufizuar, kryesisht për përdorim offline, çka do ta dobësonte rolin e euros digjitale si alternativë e plotë ndaj sistemeve ekzistuese të kartave.
Nga ana tjetër, një amendament i propozuar nga eurodeputeti italian Pasquale Tridico mbështet modelin më të gjerë të parashikuar nga Komisioni Evropian: një euro digjitale online dhe offline, si plotësuese e bankave private dhe parasë cash, me synim forcimin e sovranitetit monetar evropian dhe integritetit të tregut të përbashkët.
Amendamenti ka siguruar mbështetje nga disa grupe të mëdha politike, përfshirë socialistët, liberalët e Renew Europe, të Gjelbrit dhe të Majtën, ndërsa brenda Partisë Popullore Evropiane ka qëndrime të ndara. Forcat e ekstremit të djathtë kanë shprehur kundërshti të fortë, me disa parti që kanë kërkuar tërheqjen e plotë të projektit.
Debati për euron digjitale po shihet gjithnjë e më shumë si çështje strategjike për autonominë financiare të BE-së, në një kohë kur varësia nga infrastrukturat e pagesave jashtë bllokut konsiderohet rrezik potencial për sigurinë ekonomike të unionit.
