Shqipëria ka mësuar kundërshtarët e saj në Nations League. Në shortin e hedhur këtë të enjte në Bruksel, kuqezinjtë e drejtuar nga Sylvinho, pjesë e Ligës C dhe në vazon e parë, do të përballen me Finlandën, Bjellorusinë dhe San Marinon.
Në letër, shorti konsiderohet i favorshëm për Kombëtaren, duke pasur parasysh nivelin e rivalëve. Objektivi është i qartë: vendi i parë në grup dhe ngjitja në Ligën B.
Faza e grupeve nis në fund të shtatorit. Ndeshja e parë do të luhet në datat 24-26 shtator, ndërsa e dyta më 27-29 shtator. Takimi i tretë është planifikuar nga 30 shtatori deri më 3 tetor, ndërsa i katërti në periudhën 4-6 tetor. Dy sfidat e fundit do të zhvillohen në nëntor: 12-14 nëntor dhe 15-17 nëntor.
Me një grup të kapshëm dhe ambicie të qarta, Shqipëria hyn në këtë edicion me synimin për të hedhur një tjetër hap përpara në arenën evropiane.
