Prokuroria e Posaçme kundër Korrupsionit dhe Krimit të Organizuar (SPAK) ka përmbyllur hetimet dhe më 7 nëntor 2025 ka dërguar për gjykim në Gjykatën e Posaçme procedimin penal nr. 55/2025, që lidhet me korrupsion zgjedhor në Qarkun Lezhë gjatë zgjedhjeve parlamentare të 11 majit 2025.
Përballë drejtësisë do të dalin tre të pandehur:
- Gersi Kaçorri, i akuzuar për “Korrupsion aktiv në zgjedhje”, kryer në bashkëpunim (nenet 328 dhe 25 të Kodit Penal);
- Besnik Uka, i akuzuar për “Korrupsion pasiv në zgjedhje”, kryer në bashkëpunim (nenet 328/b dhe 25);
- Artur Jahja, po ashtu i akuzuar për “Korrupsion pasiv në zgjedhje”, kryer në bashkëpunim (nenet 328/b dhe 25).
Sipas SPAK, procedimi penal u regjistrua mbi bazën e materialeve të referuara nga Byroja Kombëtare e Hetimit (BKH). Hetimi proaktiv, i mbështetur në metoda speciale si përgjime telefonike, vëzhgime dhe veprime të tjera hetimore, ka dokumentuar përfshirjen e të pandehurve në veprimtari të kundërligjshme gjatë fushatës elektorale në Lezhë.
Nga hetimet rezulton se gjatë fushatës zgjedhore, tre të pandehurit, në bashkëpunim me njëri-tjetrin, kanë premtuar, ofruar dhe shpërndarë para për zgjedhës në Bashkinë Kurbin, me qëllim ndikimin e votës së tyre në mbështetje të Partisë Socialiste.
SPAK thekson se të pandehurit kanë qenë aktivë në terren gjatë fushatës, duke përdorur mjete monetare për të orientuar mënyrën e votimit të qytetarëve, veprime që përbëjnë vepra penale sipas legjislacionit shqiptar. Çështja tashmë i kalon për shqyrtim Gjykatës së Posaçme.
