Inspektorati i Lartë i Drejtësisë (ILD) ka nisur zyrtarisht hetimin administrativ ndaj gjyqtares së Gjykatës së Posaçme Kundër Korrupsionit dhe Krimit të Organizuar (GJKKO), Irena Gjoka, pas dyshimeve për një dënim penal të saj në Greqi. Vendimi për të kaluar çështjen tek ILD u mor nga Këshilli i Lartë Gjyqësor (KLGJ), i cili arriti në përfundimin se kompetenca për hetimin fillestar i takon Inspektoratit, duke respektuar statusin e magjistrates.
Çështja ka marrë jehonë të madhe publike, pasi dokumentacioni i referuar nga Prokuroria tregon se dënimi i pretenduar në Greqi rezulton i vlefshëm juridikisht. Gjyqtarja Gjoka ka deklaruar se nuk kishte dijeni për këtë vendim penal gjatë plotësimit të formularit të dekriminalizimit.
Procedura do të vijojë me hetimin e plotë administrativ nga ILD. Pas përfundimit të tij, çështja mund t’i rikthehet KLGJ-së për të vendosur mbi vazhdimin e ushtrimit të funksionit të gjyqtares ose mbi marrjen e masave disiplinore të tjera.
Çështja ka marrë edhe dimension politik, me kreun e Partisë Demokratike, Sali Berisha, që ka denoncuar publikisht Gjokën, duke e cilësuar të papranueshme që një person i dënuar të vijojë të ushtrojë detyrën në sistemin gjyqësor.
Hetimi i ILD-së pritet të japë një përgjigje përfundimtare mbi të ardhmen profesionale të Irena Gjokës dhe përmbushjen e kritereve ligjore për detyrën e saj në sistemin e drejtësisë shqiptare.
